كبير انت يا قلبي

غريبة كيف هذا القلب عميق وبالحجْم اصغير
وسع للحب/ولْنبضه... فرَح وهـم للأشجـان
وسع لقلوب مختلفة صعب تتهجى كلمة خيـر
بعضها الحقد غطاها هو الثوب وهي الالـوان
قلوبٍ بعْضها ما به .. سوى حبٍ وكل تقديـر
كبييييييرٍ انت يا قلبي .. و انته للغلا عنـوان
كبيرٍ انت بأسلوبك /بأطباعك/شموخـك غيـر
يجيني وقت و اتصور .. بأني في كثير أحيـان
مثل أي عاشق مفارق ويتخيل همومـه طيـر
يبي يحررْه من صدره، يطير وياخـذ الأحـزان
يروح ابعيد، يتمنى ابد ما يـرِد لـو بيصيـر
يزور العالم و يبقى .. يراقب كيف هالانسـان
يعارض القدر/ يقبله ..يموت/يحارب التغييـر
يقولوا اسأل المهموم عن اهمومه وهمك هان
وانا لا شفت هم غيري، عمَق جرحي بلا تبرير
أحس اني مثل عاجز و احس بمعنى الحرمـان
سمعت ان كل شي له حل وكل حالة لها تفسير
وانا من يوم ما أذكـر ادور حـل للأحـزان !
بعض أحزان تتبخر .. بعضها ما يبـي تبخيـر
بعضها يريد يتفجر .. ولا كنه أبـد مـا كـان
بعضها ما يفيد ابها نبخرهـا .. و لا تفجيـر
بعضها فداخلك يسكن مثل بيتٍ/مثـل أوطـان
تعبت أدّور و خايف اجـي بقصـور للتأخيـر
لقيت الحل من الله .. بنعمة اسمها النسيـان!
تصّفي قلبنا/ همّه وأحزانـه/ .. بـلا تذكيـر
حزنْنا يختفي ألمه /أثر جرحه بعـد مـا بـان
ترّجع قلبنا طفـلٍ صغيـرٍ .. خانـه التعبيـر
يهمه يبتسم/يفرح .. وقلبـه ممتلـي إيمـان
لأنه كل ما يدمـع، وحـس بداخلـه تقصيـر
تجي أمه ومتأكـد بتمسـح دمعـة الأجفـان